اسلام آباد۔15ستمبر (اے پی پی) وزیراعظم محمد شہباز شریف ہک ݙینھ دے سرکاری دورے تے قطر دے دارالحکومت دوحہ روانہ تھی ڳئے۔ پی ایم آفس دے میڈیا ونگ توں جاری بیان دے مطابق وزیراعظم محمد شہباز شریف اج دوحہ اچ تھیوݨ آلی ہنگامی عرب اسلامی سربراہی کانفرنس اچ شرکت کریسن۔ اے سربراہی اجلاس دوحہ تے اسرائیل دے فضائی حملیاں اتے فلسطین اچ انسانی حقوق دی پامالی دی مسلسل وگڑدی صورتحال دے تناظر اچ سݙیا ڳئے ۔ نائب وزیر اعظم تے وزیر خارجہ محمد اسحاق ڈار، وزیر دفاع خواجہ محمد آصف، وفاقی وزیر اطلاعات و نشریات عطا اللہ تارڑ اتے معاون خصوصی سید طارق فاطمی وزیراعظم دے اعلیٰ سطحی وفد اچ شامل ہن۔ اجلاس اچ او آئی سی دے رکن ملکاں دے سربراہان اتے اعلیٰ حکام دی شرکت متوقع ے۔ بیان اچ آکھیا ڳئے جو پاکستان قطر نال آپݨے تعلقات کوں بہوں اہمیت ݙیندے اتے قطر اتے بئے علاقائی ریاستاں دے خلاف اسرائیلی جارحیت دی شدید مذمت کریندے۔ قطر نال یکجہتی دا اظہار اتے علاقائی اتحاد کیتے وزیر اعظم محمد شہباز شریف 11 ستمبر 2025 کوں دوحہ دا دورہ کیتا ہا اتے قطر دی سلامتی اتے خود مختاری کیتے پاکستان دی پکی حمایت اتے مشرق وسطیٰ اچ امن و استحکام کیتے ایں دے عزم دا اظہار کرݨ کیتے قطری قیادت نال ملاقات کیتی ہئی۔ دوحہ اچ اج تھیوݨ آلے ہنگامی اجلاس اچ وزیراعظم پاکستان اتے بئے مسلم ملکاں دے سربراہان دی شرکت امت مسلمہ اچ مضبوط اتحاد اتے علاقائی امن قائم کرݨ دے پکے عزم کوں نشابر کریندے۔
