اسلام آباد۔2اگست(اے پی پی)وفاقی وزیر داخلہ محسن نقوی تھانہ کھنہ اسلام آباد دا ابرگت دورہ کیتے جتھاں تفتیشی افسران اپݨے کمریاں توں غائب ہن، ڈیوٹی افسر کہیں وی ڳالھ دا تسلی بخش ولدا نئیں ݙے سڳیے، فرنٹ ڈیسک سگریٹ دے دھویں نال بھریا ہویا ہا اتے تھاݨے دے کمریاں اچ ݙو نشئی وی ستے پئے ہن۔ وفاقی وزیر داخلہ محسن نقوی بغیر اطلاع تھانہ کھنہ پڄیے ہن۔ انہاں تھاݨے دے اندرو 15 سو موٹرسائیکلاں اتے کئی گاݙیاں کھڑیاں ہووݨ دا پچھیا تاں ڈیوٹی افسر ولدا نا ݙے سڳیے۔ وزیر داخلہ محسن نقوی تھاݨے دی حالت ݙیکھ تے کوڑیڄن۔ انہاں حوالات، محرر روم اتے فرنٹ ڈیسک دا وی جائزہ ڳھدے اتے گرفتار غریب ریڑھی بانان دی فوری رہائی دی ہدایت کیتی اتے لوکاں کوں موٹر سائیکلان ولا ݙیوݨ دی ہدایت کیتی اتے آکھیے جو سائلین کوں بلاوجہ انتظار کراوݨ برداشت نا کیتا ویسی۔ چیف کمشنر اسلام آباد محمد علی رندھاوا وی انہاں دے نال ہن۔
