اسلام آباد۔12دسمبر(اے پی پی) وزیراعظم محمد شہباز شریف آکھیے پاکستان کہیں صورت دیوالیہ نہ تھیسی ، اسحاق ڈار دی صدر نال ملاقات میݙی اجازت نال تھئی ، ملک دی معاشی بحالی، بقاء اتے سلامتی کیتے سو قدم اڳوں ونڄݨ کیتے تیار ہیسے ، عمران نیازی اتے ایندے حواریاں الزام لاوݨ تے ملک دی جگ ہسائی کراوݨ دے سوا کجھ نی کیتا ، تحفے اچ ملݨ آلی خانہ کعبہ دے ماڈل آلی گھڑی ویچ تے ملک دی عزت کوں نیلام کیتا، ساݙے خاندان دے خلاف مذموم مہم چلائی ڳی، ساݙے دور اچ ملݨ آلی امداد کوں شفاف طریقے نال استعمال کیتا ڳئے ، برطانیہ دی نیشنل کرائم ایجنسی کلین چٹ ݙے ݙتی اے ، ڈیلی میل دے معاملے تے اﷲ تعالیٰ اساکوں سرخرو کیتے ، جنرل (ر) قمر باجوہ عمران خان دے محسن ہن لیکن عمران نیازی محسن کش ہن، حکومت دی بھرپور کوشش اے عوام کوں پٹرولیم مصنوعات دیاں قیمتاں اچ فیدہ پڄاوے ، پاک افغان کشیدگی تے غور کیتے وختی اجلاس سݙ ڳھدے ، نواز شریف وختی وطن واپس آسن ۔ اے ڳالھ انہاں سنوار کوں پریس کانفرنس توں خطاب کریندے ہوئیں آکھی اے ۔ ایں موقع تے وفاقی وزیر خزانہ اسحاق ڈار، وفاقی وزیر منصوبہ بندی احسن اقبال، وفاقی وزیر قانون اعظم نذیر تارڑ، وفاقی وزیر اطلاعات و نشریات مریم اورنگزیب اتے وزیراعظم دے معاونین خصوصی عطاء تارڑ اتے فہد حسین وی موجود ہن۔ وزیراعظم آکھیے گزریل حکومت مسلم لیگ (ن) دے قائد نواز شریف، میکوں تے ساݙے خاندان کوں بدنام کرݨ دی گھٹیا کوشش کیتی، ساݙے خاندان تے بے بنیاد الزام لاتے ڳئن تے مذموم مہم چلائی ڳئی اے ، پانامہ توں اقامہ تئیں سارے معاملات عوام دے سامݨے ہن، اصل کیس پانامہ دا ہئی لیکن سزا اقامہ اچ ݙتی ڳئی ، پانامہ اچ تاں میاں نواز شریف دا ناں ہی کائناں ہئی ، اسلام آباد ہائی کورٹ دے جج شوکت عزیز صدیقی دا بیان ساریں دے سامݨے اے ، سچ سامݨے آ تے رہندے ۔ وزیراعظم آکھیے برطانوی نیشنل کرائم ایجنسی اساکوں کلین چٹ ݙتی اے ، عمران نیازی اتے ایندے حواریاں اونکوں ہزاراں کاغذات ݙتے، ݙو سال تحقیقات تھیندیاں رہ ڳئن ۔ اﷲ تعالیٰ میݙی عزت رکھی اے، ڈیلی میل دے ڈیوڈ روز کوں پاکستان دی سیر کرائی ڳئی، ڈیلی میل دے معاملے تے اﷲ تعالیٰ اساکوں سرخرو کیتے، ڈیلی میل غیر مشروط معافی منگی، ڈیلی میل میں توں نی پاکستانی عوام توں معافی منگی، میں ڈیلی میل دے خلاف عدالت ونڄݨ د اعلان کیتا ہئی ، پہلے لیگل نوٹس بھجوایا، ترائے سال تئیں اخبار لیت و لعل توں کم گھن رہیا ، کئی واری اوں مقدمہ دی سماعت اچ التواء دی درخواست کیتی تے کوویڈ دا ول ول بہانہ بݨایا، جیڑھی امداد وی ݙتی ڳئی او زچہ و بچہ دے علاج اتے پرائمری تعلیم کیتے خرچ کیتی ڳئی ، اخبار معافی نامہ باقاعدہ شائع کیتے۔ انہاں آکھیے 2008ء توں 2018ء دے دوران 600 ملین پائونڈ دی رقم پاکستان تے پنجاب کیتے ݙتی ڳئی، ساݙے دور اچ ملݨ آلی امداد کوں شفاف طریقہ نال خرچ کیتا ڳیا عمران نیازی تے ایندے حواریاں الزام لاوݨ دے سوا کجھ نی کیتا ، عمران نیازی اتے ایندے حواری الزام ثابت نہ کرسڳیے ، عمران خان ڳالھیں مندے دی سیاست کوں ودھایا ، عمران نیازی پاکستان دی جگ ہسائی کراوݨ سوا کجھ نی کیتا ، ذاتی سیاست کیتے ملک دا ضیان نی کرݨا چاہیدا۔ انہاں آکھیے سعودی وزیراعظم و ولی عہد شہزادہ محمد بن سلمان خانہ کعبہ دے ماڈل آلی ھک گھڑی بݨوائی ہئی اتے او گھڑی پاکستانی عوام دی عزت کیتے ݙتی، مسلمان خانہ کعبہ دی حرمت اتے ناموس رسالت تے کٹ مردن ، عمران نیازی گھڑی ویچ تے گھٹیا حرکت کیتی۔ انہاں آکھیے عمران نیازی ملکی معیشت کوں تباہ کیتا ۔ دوست ملکاں دے نال تعلقات خراب کیتے ، ٻاہرلی امداد روکݨ کیتے کوڑیاں خبراں کھنڈائن ، عمران نیازی دی بدعنوانیاں دے حوالے نال فنانشل ٹائمز ݙسائے ، عمران نیازی جے سچا اے تاں فنانشل ٹائمز دے خلاف کیس کرے۔ سابق حکومت دے دور اچ مریم نواز کوں گرفتار کیتا ڳیا، عمران نیازی تے ایندے حواریاں کوں شرم نہ آئی، اسلام آباد ہائی کورٹ مریم نواز کوں کلین چٹ ݙتی اے جݙاں جو عمران نیازی آصف علی زرداری دی بھیݨ فریال تالپور کوں عید دی رات گرفتار کرایا، ݙوجھے پاسے آپݨی بھیݨ کوں ایمنسٹی سکیم دے ذریعے این آر او ݙیوایا جیں دی دبئی تے امریکہ اچ جائیداداں وٹھیاں ڳئن ۔
.jpg)
