اسلام آباد۔20مارچ(اے پی پی)پاکستان عزم دوہرائے جو مظلومیت دی بھارت دی فرضی داستان پاکستان دی سرزمین تے دہشت گردی کوں ہوا ݙیوݨ اتے بھارت دے غیر قانونی زیر تسلط جموں و کشمیر اچ ریاست ولوں منظور شدہ جبر اچ ملوث تھیوݨ کوں نئیں لکا سڳدی۔ دفتر خارجہ دے ترجمان شفقت علی خان پریس بریفنگ اچ آکھیے جو پاکستان اچ دہشت گردی اتے بلوچستان کوں غیر مستحکم کرݨ دے پچھو بھارت دا ہتھ واضح اے، بھارت صرف پاکستان اچ ہی نئیں پورے خطے اچ اینڄھیاں غیر قانونی سرگرمیاں دی سرپرستی کریندا پئے، بھارت کوں ٻنھاں دے سر الزام دھرݨ دی بجائے غیر ملکی علاقیاں اچ ٹارگٹڈ قتل، تخریب کاری و دہشت گردی دی منصوبہ بندی دے اپݨے ریکارڈ تے دید ٻھنواݨی چاہیدی اے، بھارت بلوچستان اچ جعفر ایکسپریس تے حملے دی مذمت نئیں کیتی۔ انہاں آکھیا جو پاکستان کوں جموں و کشمیر بارے بھارتی قیادت دے بلاجواز بیانات تے چنتا اے، اے بھارت ہی ہا ڄئیں 1948 اچ جموں و کشمیر دا مسئلہ اقوام متحدہ اچ ڳھن ڳیا ہا، تہوں بھارت کوں سلامتی کونسل اتے ایندے ارکان کوں بعد اچ منظر تھیوݨ آلی قرارداداں کیتے مورد الزام ٹھہراوݨ دا کوئی حق نئیں۔ ترجمان آکھیے جو بے بنیاد دعویاں نال اے حقیقت نئیں لک سڳدی جو جموں و کشمیر ہک بین الاقوامی منیا ہویا متنازعہ علاقہ اے جیندی حتمی حیثیت اقوام متحدہ دی زیر نگرانی استصواب رائے نال ہی تھیوݨی اے ڄیڑھی اقوام متحدہ دی سلامتی کونسل دی متعلقہ قرارداداں اچ درج اے۔ جنوبی ایشیا اچ امن و استحکام بھارت دے سخت رویے اتے تسلط پسندانہ عزائم سانڳے یرغمال ٻݨیا ہوئے، بھارت ولوں پاکستان مخالف بیانیہ ݙوطرفہ ماحول کوں خراب اتے امن و تعاون دے امکانات روکیندے ڄیکوں روکݨا چاہیدے۔
